خراريف 1

ترقوميا

ما كنتش اتخيل انو بس أكون هناك بدها تتحطم طيارة جيش اسرائيلية، كنت يمكن لساتني مخلص صف سابع ومعزب (النوم في الخلاء) أنا وأخوي مع سيدي وجدتي بالواد (مجموعة أراضي جبلية نملكها في قريتنا وتسمى وادي القلمون). سيدي نادانا وحكالنا هاي الطيارة شكلها بدها تقع ناحية البلد (تطلق على القرية باللهجة المحكية)، رحنا نركض ونطّلع وشفنا الدخان بعيد. مر شوية رعيان سألهم سيدي وحكولو انو في طيارة جيش تحطمت تحت قبال الزردوم (اسم يطلق على مجموعة أراضي بين البلد والواد). بعد ساعتين خلاني سيدي أروّح أنا وأخوي على الجحشة على البلد، أول مرة بروّح أنا ويا لحالنا لأنو عمي كان سارح بالغنمات وفش حدا يوصلنا. بس مرينا جنب اليهود، خلاني أخوي أركب على الجحشة، كانت يوميها أول مرة أشوفهم عن قريب بمكان غير الجسر والمحاسيم (نقاط التفتيش الاسرائيلية). مرينا جنبهم ومخفتش والله بس كنت بدي أشوف شو صار وهما بصرخوا على الناس اللي متجمعين انو ماحدّش يقرب. أول مرة أشوف ناس كثير بهاي المنطقة، لأنو الجبل فوق النا احنا والزردوم ما بعزبش في غير شوية سبعاوية وعند زتونات ناصرالدين (نسبة لمالكهاعادل ناصرالدين الخليلي) ما حدّش بقرب خصوصاً بالليل عشان كانو يحكو انو في جنية بتطلع بالليل للرعيان المروحين من هاي الطريق.

بس وصلنا البلد عرفنا القصة انو الطيارة وقعت لحالها وانو اليهود سكرو المنطقة وما خلوش حدا يقرب وجمعو كل قطعة وحديدة من الطيارة. هسّه صحيح انو في ولاد لمولهم كمن قطعة من الطيارة وخبوهن، بس الجيش لف على البلد وبعدين عرفت انهم ظلو شهرين وهمه يلمو بقطع الطيارة. هسّة الولاد كانو بدهم يبيعو القطع حديد، زي أيام زمان لمّا كانو أبّهاتهم يلمو فشك. أبوي كان يحكيلنا انهم كانو يلمو فشك من ورا الجيش الإسرائيلي لما يتدرب ويبعو الفشك بالكيلو لواحد من إذنا بأكم شيكل (الآن ال5 شيكل تعادل دينار أردني) أو يدورو على ذهب من المُغر والمقابر اليهودية والمعاصر الرومانية عشان يطلعو مصروف المدرسة. لحد هسّة وين ما بتلف بأي مكان هناك بتلاقيهم بدورو على حديد ونحاس عشان يبيعوهن بالكيلو، صارت مصدر رزق لكثير ناس، آخر مرة روحنا فيها لقينا بأرضنا تحت مليان زي بقايا قزاز وزبالة بسأل أبوي عمي شو جاب هالوسخ عالأرض فحكالو وهو مش شايل عيني عن الأرض بدوّر انهم صارو يلمو أي حاجة قدامهم عشان يدورو على حديد ونحاس يبيعوهن!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s