فلان الفلاني – المانيفستو – مصطفى إبراهيم

فُلان الفُلاني اللي كا يومها جنبي
ساعة لما بدأوا في ضرب الرصاص
فُلان الفُلاني اللي ما اعرفش اسمه
ف دايماً بقُول يا ابن عمي وخلاص
فُلان اللي سابلي بقية ساندويتشه
ليلة لمًّا شافني بغَنِّي وجَعان
فُلان اللي مش فاكرة غير شكل وشه
فُلان اللي عَدًّاكي جُوًّا الميدان
فُلان اللي فَتِّشني بِالإبتسامة
فُلان اللي قال هو فعلاً هيمشي؟
فُلان اللي قاللي طريق السلامة
ساعة لمًّا قُلنا زهقنا وهنمشي
فُلان اللي ما رضيش ياخد مِني أُجرة
ساعة لمًّا قلت إني رايح مُظاهرة
فُلان اللي قاللي هيتنحى بُكرة
وهنفرح ونرقص وراح تبقى سهرة
فُلان اللي بِالفيسبا طالع وداخل
يجيب اللي يتصاب من الضرب جُوًّا
فُلان اللي ف الضرب عند المداخل
يرجًّع صحابه.. ويستنى هُوًّا
فُلان اللي كان بِيناولني القزايز
ويقفلها بعد اما أعبّيها جاز
فُلان اللي كان وشه مليان قزاز
فُلان اللي وزَّع عليك بطانية
ويسأل “فيه جنبك مكان ع الرصيف؟”
فُلان اللي نازل عشان القضية
فُلان اللي نازل عشان الرغيف
فُلان اللي ما طلعش جُوًّا البرامج
وكان بس صوته في قلب الهتاف
فُلان اللي روًّح أَكل واستحمى
فُلان اللي ضايع في وسط الآلاف
فُلان اللي غرًّقلي خَل الكوفية
وشالني ساعة لما جَت طلقة فيّا
فُلان اللي مات يومها تلزمله دِيّة
من ابن الفُلاني اللي كَل لحمه حاف

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s